డైలీ మిర్రర్ డాట్ న్యూస్, ఆగస్టు 24,2025: కన్నడ ప్రేక్షకుల మనసుల్లో ప్రత్యేక స్థానం సంపాదించుకున్న నటుడు దాలి ధనంజయ్ పుట్టినరోజు సందర్భంగా, ఆయన హీరోగా నటిస్తున్న “జింగో” సినిమా సెకండ్ లుక్ పోస్టర్ ను చిత్రబృందం విడుదల చేసింది. దాలి పిక్చర్స్, త్రిశూల్ విజనరీ స్టూడియోస్ నిర్మిస్తున్న ఈ సినిమాపై ఇప్పటికే ప్రేక్షకుల్లో మంచి అంచనాలు నెలకొన్నాయి.

గత సంవత్సరం విడుదలైన “జింగో అనౌన్స్‌మెంట్ వీడియో” సోషల్ మీడియాలో భారీ హంగామా రేపింది. అందులో దాలి ధనంజయ్ చెప్పిన “జింగో మోనాలాగ్”, అలాగే వినిపించిన “నారా నారా జింగో” పాటకు ప్రేక్షకుల నుండి అద్భుతమైన స్పందన లభించింది. ఈ విజయాన్ని బలంగా తీసుకున్న చిత్రబృందం, తొలుత చిన్న పట్టణం నేపథ్యంలో ఆలోచించిన కథను మరింత విస్తరించి, భారీ స్థాయిలో ప్రేక్షకులకు విజువల్ ట్రీట్ అందించేలా తెరకెక్కిస్తోంది.

దర్శకుడు శశాంక్ సోగల్ మాట్లాడుతూ –
“ప్రేక్షకులు ఇచ్చిన స్పందన మాకు మరింత ఉత్సాహాన్నిచ్చింది. అందుకే కథను పెద్ద స్థాయిలో రూపొందిస్తున్నాం. 2026లో విడుదల కాబోయే ఈ సినిమా రాజకీయ వ్యంగ్యం, కామెడీ, యాక్షన్, థ్రిల్లర్ అంశాల కలయికగా ప్రత్యేకమైన అనుభూతిని అందిస్తుంది. ప్రస్తుతం కన్నడ, తెలుగు భాషల్లో నిర్మాణం జరుగుతోంది. అదనంగా అద్భుతమైన నటీనటులను కూడా పరిచయం చేయబోతున్నాం” అని తెలిపారు.

అలాగే ఆయన మాట్లాడుతూ –
“ఈసారి విడుదల చేసిన పోస్టర్‌లో అనేక సంకేతాలు దాగి ఉన్నాయి. పైకి సరదాగా కనిపించినా, లోతుగా గమనిస్తే కథపై ఆసక్తికరమైన వివరాలు బయటపడతాయి. సినిమా కూడా అలానే ఉంటుంది. ప్రతి వర్గం ప్రేక్షకుడికి ఏదో ఒక సందేశం అందుతుంది. మొత్తంగా 2026లో ‘జింగో’ ప్రేక్షకులను విశేషంగా అలరిస్తుంది” అని శశాంక్ చెప్పారు.