డైలీ మిర్రర్ డాట్ న్యూస్, అమరావతి, మార్చి 15,2026: తెలుగు జాతి ఆత్మగౌరవ ప్రతీక, ప్రత్యేక రాష్ట్ర సాధన కోసం ప్రాణాలనే ధారపోసిన అమరజీవి పొట్టి శ్రీరాములు స్మృతి చిహ్నం ఆవిష్కరణకు ముహూర్తం సిద్ధమైంది.

రాజధాని అమరావతిలోని శాఖమూరులో అత్యంత ప్రతిష్ఠాత్మకంగా నిర్మించిన ‘స్టాచ్యూ ఆఫ్ సాక్రిఫైస్’ (త్యాగ ప్రతీక) కాంస్య విగ్రహాన్ని మార్చి 16న ఘనంగా ఆవిష్కరించనున్నారు. శ్రీరాములు గారి 125వ జయంతిని పురస్కరించుకుని ఈ చారిత్రాత్మక ఘట్టం ఆవిష్కృతం కానుంది.

త్యాగానికి నిలువెత్తు రూపం..

తెలుగు ప్రజల కోసం పొట్టి శ్రీరాములు చేపట్టిన 58 రోజుల అలుపెరుగని పోరాటానికి గుర్తుగా, ఈ విగ్రహాన్ని 58 అడుగుల ఎత్తుతో నిర్మించడం విశేషం. అమరజీవి పొట్టి శ్రీరాములు మెమోరియల్ ట్రస్ట్ నేతృత్వంలో కేవలం ఆరు నెలల రికార్డు కాలంలోనే ఈ విగ్రహ నిర్మాణాన్ని పూర్తి చేశారు.

స్మృతి వనం.. స్ఫూర్తి కేంద్రం..

రాష్ట్ర ప్రభుత్వం కేటాయించిన 6.8 ఎకరాల విస్తీర్ణంలో ఆహ్లాదకరమైన ‘స్మృతి వనం’ను తీర్చిదిద్దారు. ఈ పార్కులో ప్రతిష్ఠించిన భారీ విగ్రహం తెలుగు వారి పోరాట స్ఫూర్తిని, స్వాభిమానాన్ని భవిష్యత్ తరాలకు గుర్తుచేసేలా ఉంది.

ముఖ్య అతిథులుగా సీఎం, డిప్యూటీ సీఎం..

ఈ ఉత్సవానికి ముఖ్యమంత్రి నారా చంద్రబాబు నాయుడు, ఉప ముఖ్యమంత్రి కొణిదెల పవన్ కళ్యాణ్ హాజరై విగ్రహాన్ని ఆవిష్కరించనున్నారు. వీరితో పాటు మంత్రి నారా లోకేష్, ఇతర ప్రజాప్రతినిధులు, ప్రముఖులు ఈ వేడుకలో పాల్గొననున్నారు.

“తెలుగు జాతి ఉనికిని చాటిచెప్పిన మహనీయుని గౌరవార్థం చేపట్టిన ఈ ఆవిష్కరణ కార్యక్రమానికి తెలుగు ప్రజలందరూ తరలిరావాలి.”-డూండి రాకేశ్, మేనేజింగ్ ట్రస్టీ

రేపు ఉదయం 10 గంటలకు ప్రారంభం కానున్న ఈ కార్యక్రమం, ఆంధ్రప్రదేశ్ రాజధానిలో మరో చారిత్రక మైలురాయిగా నిలవనుంది.