డైలీ మిర్రర్ డాట్ న్యూస్,హైదరాబాద్, మార్చి 6, 2026 : సస్పెన్స్ థ్రిల్లర్లకు తెలుగులో ఎప్పుడూ మంచి ఆదరణ ఉంటుంది. అదే కోవలో నూతన నటీనటులతో, ఉత్కంఠభరితమైన కథాంశంతో ప్రేక్షకుల ముందుకు వచ్చిన చిత్రం ‘మిషన్ C1000’. తేజేశ్వర్ స్వయంగా కథానాయకుడిగా నటిస్తూ దర్శకత్వం వహించిన ఈ సినిమా నేడు థియేటర్లలో విడుదలైంది. మరి ఈ ‘మిషన్’ ఎంతవరకు సక్సెస్ అయిందో చూద్దాం..

కథా నేపథ్యం..

సినిమా ఒక భావోద్వేగమైన సన్నివేశంతో మొదలవుతుంది. హీరోకి చిన్నతనంలో రోడ్డుపై ఒక పసికందు దొరుకుతుంది. ఆ పాపను తన ప్రాణసమానమైన చెల్లిగా భావించి, అమ్మానాన్నలతో కలిసి ఒక చిన్నపాటి సంతోషకరమైన ప్రపంచాన్ని నిర్మించుకుంటాడు హీరో.

Read this also..Souq-e-Deccan Expo Debuts in Gudimalkapur with 5,000+ Attendees..

ఇదీ చదవండి..అపోలో ఫార్మసీ1,000వ స్టార్ ను లాంఛనంగా ప్రారంభించిన ఉపాసన కొణిదెల..

క్యాబ్ డ్రైవర్‌గా పనిచేసే హీరో జీవితంలోకి హీరోయిన్ ప్రగ్య (ప్రగ్య నయన్) ప్రవేశిస్తుంది. ఆమె తండ్రి (అనీష్ కురువిల్లా) కోరిక మేరకు హీరో ఆమెకు బాడీగార్డ్‌గా చేరతాడు.

అంతా సాఫీగా సాగుతుందనుకున్న సమయంలో కథలో అనూహ్య మలుపులు వస్తాయి. హీరోయిన్ సోదరి అదృశ్యం కావడం, అదే సమయంలో హీరో తల్లిదండ్రులు అనుమానాస్పద స్థితిలో మరణించడం కథను మలుపు తిప్పుతాయి. అసలు ఈ మరణాల వెనుక ఉన్న మిస్టరీ ఏంటి? ఇంటర్వెల్ వద్ద ఇచ్చే ఆ భారీ ట్విస్ట్ ఏంటి? పోగొట్టుకున్న వారి కోసం హీరో చేసిన పోరాటమే ఈ ‘మిషన్ C1000’.

విశ్లేషణ..
దర్శకుడు తేజేశ్వర్ ఎంచుకున్న కథాంశం పాతదే అయినా, దాన్ని నడిపించిన విధానం ఆకట్టుకుంటుంది. ప్రథమార్ధంలో హీరో ఫ్యామిలీ ఎమోషన్స్, లవ్ స్టోరీతో సరదాగా సాగిపోతుంది. అయితే, అసలు కథ ద్వితీయార్థంలోనే మొదలవుతుంది. ఇంటర్వెల్ వద్ద ఇచ్చే ట్విస్ట్ ప్రేక్షకుల్లో తదుపరి ఏం జరుగుతుందనే ఆసక్తిని (క్యూరియాసిటీ) పెంచుతుంది.

దర్శకుడిగా తేజేశ్వర్ మొదటి సినిమా అయినా, ఎక్కడా తడబడకుండా గ్రిప్పింగ్‌గా తెరకెక్కించారు. ముఖ్యంగా ప్రీ-క్లైమాక్స్, క్లైమాక్స్ సన్నివేశాలు ప్రేక్షకులను ఆకట్టుకుంటాయి. ఒక వైపు కమర్షియల్ ఎలిమెంట్స్ చూపిస్తూనే, మరోవైపు థ్రిల్లింగ్ అంశాలను బ్యాలెన్స్ చేయడంలో దర్శకుడు సఫలమయ్యారు. మేకింగ్ పరంగా కూడా ఎక్కడా కొత్త దర్శకుడి సినిమా అనే భావన కలగదు.

నటీనటుల పనితీరు..

హీరోగా తేజేశ్వర్ ఎనర్జిటిక్ పెర్ఫార్మెన్స్ ఇచ్చారు. ఫస్ట్ హాఫ్‌లో హుషారుగా కనిపిస్తూనే, యాక్షన్ సన్నివేశాల్లో మాస్ లుక్‌లో మెప్పించారు. హీరోయిన్ ప్రగ్య నయన్ తన గ్లామర్‌తో పాటు నటనతోనూ ఆకట్టుకుంది. కబీర్ సింగ్, జయప్రకాష్, అనీష్ కురువిల్లా వంటి సీనియర్ నటులు తమ పాత్రలకు పూర్తి న్యాయం చేశారు.

సాంకేతిక విభాగం..

శ్రీధర్ ఆత్రేయ అందించిన సంగీతం సినిమాకు ప్రధాన బలం. ముఖ్యంగా బ్యాక్ గ్రౌండ్ స్కోర్ థ్రిల్లర్ సీన్స్‌ను బాగా ఎలివేట్ చేసింది. మార్తాండ్ కె. వెంకటేష్ ఎడిటింగ్ సినిమాను స్పీడ్‌గా నడిపించింది. అనవసరమైన ల్యాగ్ లేకుండా క్రిస్పీగా కట్ చేశారు. మహేందర్ ఎస్ సినిమాటోగ్రఫీ సినిమాను రిచ్‌గా చూపించింది. నిర్మాణ విలువలు బాగున్నాయి, నిర్మాతలు ఎక్కడా రాజీ పడకుండా సినిమాను గ్రాండ్‌గా నిర్మించారు.

నటీనటులు: తేజేశ్వర్, ప్రగ్య నయన్, కబీర్ సింగ్, జయప్రకాష్, సుధ, అనీష్ కురువిల్లా, సంజయ్ పాండే తదితరులు

సంగీతం: శ్రీధర్ ఆత్రేయ

కూర్పు: మార్తాండ్ కె. వెంకటేష్

ఛాయాగ్రహణం: మహేందర్ ఎస్.

నిర్మాతలు: శ్రీమతి కిరణ్ మయి, విరాట్ శౌర్య

దర్శకత్వం: తేజేశ్వర్

విడుదల తేదీ: మార్చి 06, 2026

రేటింగ్: 3/5..

ప్లస్ పాయింట్స్..
ఉత్కంఠ కలిగించే సెకండాఫ్

క్లైమాక్స్ ట్విస్ట్లు

హీరో నటన, మేకింగ్

నిర్మాణ విలువలు

మైనస్ పాయింట్స్..
ఫస్ట్ హాఫ్‌లో కొన్ని సాదాసీదా సన్నివేశాలు

అక్కడక్కడా కనిపించే పాత చింతకాయ పచ్చడి లాంటి డ్రామా

సస్పెన్స్ థ్రిల్లర్ సినిమాలను ఇష్టపడే వారికి ‘మిషన్ C1000’ ఒక మంచి ఛాయిస్. ఎమోషన్స్ తో కూడిన థ్రిల్లింగ్ రైడ్‌ను ఈ వీకెండ్‌లో ఎంజాయ్ చేయవచ్చు.