డైలీ మిర్రర్ డాట్ న్యూస్, ముంబయి, డిసెంబరు 24, 2025: భారతదేశపు అతిపెద్ద ప్రైవేట్ రంగ బ్యాంక్, హెచ్‌డీఎఫ్‌సీ (HDFC) బ్యాంక్, తన మొట్టమొదటి స్వతంత్ర వార్షిక కార్పొరేట్ సామాజిక బాధ్యత (CSR) నివేదికను విడుదల చేసింది. బ్యాంక్ చేపట్టిన ‘పరివర్తన్’ కార్యక్రమం గత దశాబ్ద కాలంగా సమాజంలో తీసుకొచ్చిన విప్లవాత్మక మార్పులను ఈ నివేదికలో పొందుపరిచారు.

ఖర్చులోనూ.. ప్రభావంలోనూ అగ్రగామి
2024-25 ఆర్థిక సంవత్సరంలో హెచ్‌డీఎఫ్‌సీ బ్యాంక్ సీఎస్ఆర్ కార్యకలాపాల కోసం ₹1,068.03 కోట్లు వెచ్చించింది. గత ఏడాదితో పోలిస్తే ఇది సుమారు ₹123 కోట్ల వృద్ధిని నమోదు చేయడం గమనార్హం. కాగా, ఈ కార్యక్రమం ప్రారంభమైనప్పటి నుండి ఇప్పటివరకు మొత్తం ₹6,176 కోట్లు వెచ్చించి, దేశవ్యాప్తంగా 10.56 కోట్ల మంది జీవితాల్లో వెలుగులు నింపింది.

ప్రధాన దృష్టి సారించిన రంగాలు (6 స్తంభాలు):
బ్యాంక్ తన సామాజిక బాధ్యతను ఆరు కీలక విభాగాల ద్వారా అమలు చేస్తోంది:

గ్రామీణాభివృద్ధి: 14.92 లక్షల కుటుంబాలకు మౌలిక సదుపాయాలు,స్వచ్ఛమైన తాగునీటి సౌకర్యం.

విద్య: 2,600 స్మార్ట్ పాఠశాలల ఏర్పాటు, 29,000 పైగా స్కాలర్‌షిప్‌ల పంపిణీ.

నైపుణ్యాభివృద్ధి: 7.2 లక్షల మందికి వృత్తి శిక్షణ ద్వారా స్థిరమైన జీవనోపాధి.

ఆరోగ్యం: మొబైల్ క్లినిక్‌లు,క్యాన్సర్ చికిత్స మద్దతు ద్వారా 3 లక్షల మందికి లబ్ధి.

ఆర్థిక అక్షరాస్యత: ‘విజిల్ ఆంటీ’ ప్రచారం ద్వారా 21 లక్షల మందికి సైబర్ మోసాలపై అవగాహన.

పర్యావరణం: 14,520 నీటి సంరక్షణ నిర్మాణాలు, 69,000 సోలార్ లైట్ల ఏర్పాటు.

సరిహద్దు గ్రామాలకు సైతం చేయూత
దేశంలోని 28 రాష్ట్రాలు, 8 కేంద్రపాలిత ప్రాంతాల్లో విస్తరించిన ఈ కార్యక్రమం, ముఖ్యంగా ప్రభుత్వం గుర్తించిన 112 ఆకాంక్షిత జిల్లాల్లో 102 జిల్లాలకు చేరుకుంది. వీటితో పాటు 298 సరిహద్దు గ్రామాల్లో కూడా అభివృద్ధి పనులు చేపట్టినట్లు బ్యాంక్ వెల్లడించింది.

క్రికెట్ ప్రపంచంలో హ్యుందాయ్ హవా: ఐసీసీ టోర్నీలకు ‘ప్రీమియర్ పార్టనర్‌’గా ఒప్పందం

మేనేజ్‌మెంట్ స్పందన
ఈ సందర్భంగా బ్యాంక్ డిప్యూటీ మేనేజింగ్ డైరెక్టర్ కైజాద్ భరుచా మాట్లాడుతూ.. “పరివర్తన్ అనేది కేవలం ఒక కార్యక్రమం కాదు, ప్రజలు తమ సామర్థ్యాన్ని గుర్తించి మెరుగైన భవిష్యత్తును నిర్మించుకోవడానికి మేము అందిస్తున్న తోడ్పాటు. గత పదేళ్లుగా స్థానిక అవసరాలకు అనుగుణంగా మేము చేస్తున్న కృషి సత్ఫలితాలను ఇస్తోంది” అని వివరించారు.

ఐక్యరాజ్యసమితి నిర్దేశించిన 17 స్థిరమైన అభివృద్ధి లక్ష్యాలలో (SDGs) 10 లక్ష్యాలకు అనుగుణంగా హెచ్‌డీఎఫ్‌సీ తన సీఎస్ఆర్ ప్రయాణాన్ని కొనసాగిస్తోంది.